Jæja, í fyrsta skipti í sögu Conráðs gerist það að ekki er sótt um svæði fyrir Aðalfund Conráðs hjá SVFR þrátt fyrir að allir félagsmenn séu í SVFR til margra ára.  Síðustu vikur var mikið rætt um hvað ætti að gera varðandi Aðalfund.  Síðasti Aðalfundur var haldinn í Gljúfurá í Borgarfirði og þar var tekin ákvörðun um þangað skyldi ekki farið aftur þrátt fyrir góðan aðbúnað í húsi og kunnum við árnefnd Gljúfurár bestu þakkir fyrir góðar stundir við ána.

Fyrrverandi formaður mundar tvíhenduna í Bergsnös 2010

Stjórn Conráðs er í óða önn um þessar mundir að ganga frá veiðileyfi vegna aðalfundar árið 2012.  Það er ljóst að Gljúfurá í Borgarfirði verður tekin út af lista Conráðsmanna en Stóra-Laxá I-II er efst á óskalista Conráðsmanna.  Síðasta sumar var svo sannarlega gjöfult í Stóru og vonandi að næsta sumar verði ekki síðra.

Nökkvi S

Viljum hvetja alla félagsmenn SVFR til að mæta á aðalfund SVFR þann 26. nóv næstkomandi á Grand Hótel kl. 13:30  Þar fer fram kosning til stjórnar og við Conráðsmenn ætlum að sjálfsögðu að mæta og kjósa.

Aðalfundur Conráðs var að þessu sinni haldinn í veiðihúsinu við Gljúfurá að kveldi hins 8. september, árið 2011.



Satt best að segja voru aðstæður eins og verst verður á kosið þegar kemur að veiði í þessari blessuðu á.  Lítið (sem ekkert) vatn, heiðskýrt og norðan bál - svokallaður íslenskur skítakuldi.  Engu að síður voru menn bjartsýnir, sérstaklega þar sem að bækur sýndu að eitthvað hafði komið á land undanfarna daga.  Ekki minnkaði bjartsýnin þegar fréttist af því að Noregsdeildin hafði náð einum á land á fyrstu vakt.

Það endaði þó með því að þetta var sá eini sem kom á land í túrnum.

Á aðalfundi bar það helst til tíðina að undirritaður reyndi að koma því í lög félagsins að í þessari á skyldi aldrei aftur veitt!  Þó svo að hafa staðið fyrir því að það yrði farið í Gljúfuránna þetta árið ásamt öðrum stjórnarmeðlimum. 
Þetta var fellt - enda benti Fundar- (og Útfararstjóri) á að skrítið skuli að festa í tilgang félagsins að "ekki" skuli veitt á ákveðnu svæði.

Eftir venjuleg aðalfundarstörf var komið að kosningu til stjórnar þar sem niðurstöður urðu þær að Útfarastjórinn, Niðurfallið og Hrokinn koma til með að stýra Conráð næsta tímabil - hið minnsta.  Útfarastjórinn var kosinn formaður eftir æsispennandi kjör þar sem að kjósa þurfti 4 sinnum til að fá niðurstöðu.



Voru félagsmenn sammála um að hér væri á ferðinni óhemju glæsileg stjórn og gaman að sjá Útfarstjórann í hlutverki formanns í fyrsta skipti frá upphafi.  Bíða menn í ofvæni eftir fréttum úr þeirra herbúðum vegna veiði næsta árs.

Það var bryddað uppá nýjung í þessari ferð þegar að Stjórnin kynnti ConráðsBikarinn.  Hann skal veita fyrir stærsta lax eftir þrjár vaktir í hverjum túr.  Norgesdeildin veitti bikarnum viðtöku við dynjandi lófaklapp frá félagsmönnum - sem enn voru vakandi.



Lax eða ekki lax - alltaf eru Conráðstúrarnir hátindur ársins.  Þetta var ákaflega skemmtilegur tími þar sem að náttúrufegurð - norðurljós og góður félagsskapur standa uppúr í minningunni.

Hér má sjá nokkrar myndir úr túrnum.

Fráfarandi stjórn þakkar fyrir sig og hlakkar til nýrra ævintýra.

Fyrir hönd fráfarandi Stjórnar,
Fyrrv. Formaður
LazyMúmín

Seint skrifa sumir ... en skrifa þó.



4/8 hlutar Conráðs (semsagt 2/4 hlutar ,,, eða öllu heldur 1/2 hluti) Conráðs var að störfum í Laxá í Aðaldal í lok ágúst.  Með í för voru Mokveiðifélagið, Gunni og Ási, Hilli Hans, Matti, Jón Óskar, Klaus Frimor, Örn Kjartanss, og Davíð.

Það voru hálf súrir veiðimenn sem mættu okkur þegar við komum í hús.  Gengi sem hefur veitt þarna í fjöldamörg ár hafði einungis náð 11 löxum.  Við létum það ekki á okkur fá enda bjartsýnir með eindæmum.

Verkfræðimúmín skoðaði allar bækur í þaula og tók sig til og spáði fyrir um útkomu túrsins.  Með lymskulegt glott á vörum fullyrti hann að við myndum ná 25 löxum - en vildi ekki gefa upp aðferðafræðina við útreikninginn fyrr en í lok túrs.  Lazymúmín gladdist gríðarlega, vitandi að það má treysta orðum Verkfræðimúmín.



Til að gera langa sögu stutta var þetta óvenju glæsilegur túr.  Þar gerðust ævintýri sem að menn eiga eftir að segja barnabörnum frá.  Helst ber að nefna að Gunni og Ási veiddu 2 dreka - í sama hylnum - á sömu fluguna - á sama klukkutímanum.  Ási með 20 pundara og Gunni með 26 pundara í Presthyl, báðir teknir á Skógá túbu.



Þegar að fjórðu vakt var lokið, var Niðurfallið kominn með 2 og Verkfræði- og Lazymúmín með sitthvorn og aðeins farið að síga í Hrokann.  Það skyldi þó ekki fara þannig að hann færi aftur laxlaus heim!  En þá brast á með ævintýri ....

Ég birti hér með kafla úr bókinni "Laxahvíslarinn" sem að undirritaður er með í vinnslu um þennan ótrúlega veiðimann.

"Eitthvað gerðist í breikinu.  Glampinn í augum Hrokans sást langar leiðir.  Hann skundaði öruggum skrefum að bílnum.  Stefnan var tekin á Grundarhorn.  Það tók ekki nema 5 mínútur að keyra að veiðistaðnum og á meðan ríkti dauðaþögn í bílnum.  Aldrei þessu vant sagði Hrokinn ekki orð heldur gekk þéttum skrefum úr bílnum og byrjaði að stara á hylinn.  Fljótlega beindust sjónir hans að steininum í lænunni sem að sker sig frá Grundarhorni.  Hrokinn reif upp strá og með einu handtaki var hann búinn að tæta fræin af stráinu.  Hann stráði þeim upp í loft og fylgdist með því hvernig þau sáldruðust niður í mjúkri golunni.  Niðurfallið horfði dolfallið á; það var greinilegt - Laxahvíslarinn var mættur á svæðið.  Krauni ætlaði að taka til máls en var ýtt til hliðar af Hrokanum.  Hann gekk öruggum skrefum að bakkanum og kastaði.  

Drekinn lá í makindum við botninn, þegar hann skyndilega sér eitthvað skera hylinn á leifturhraða.  Þetta hafði hann aldrei séð áður; þessa ákveðni og þennan hraða.  Hann bylti sér aðeins, hálf óöruggur um hvernig hann ætti að bregðast við.  Hrokinn sá byltuna, en breytti ekki um svip heldur mundaði vopnið og kastaði aftur.  Í þetta skiptið var Drekinn viðbúinn, en náði ekki að hrifsa til sín þennan óboðna gest - slíkur var hraðinn.  Skvetturnar þeyttust upp úr ánni og nokkrir dropar lentu á vanga Hrokans. Rólega þurrkaði hann vangann og hnusaði af hendinni.  Enginn tók eftir því þegar að ofurlítið glott læddist yfir varir Hrokans, enda hvarf það í sömu andrá.

Hrokinn vissi strax hvað var að gerast og það vissi Krauni líka.  Ekkert mátti útaf bera og nú tók eðlisávísun atvinnumannsins við.  Án þess að segja orð við hvorn annan var Krauni búinn að hlaupa niður að bíl til að ná í leynivopnið.  Á meðan stóð Hrokinn við bakkann, hreyfingarlaus og starði stálköldum augum niður á risann.  Niðurfallið sá hann hvísla en hvaða þulu hann fór þar með fáum við aldrei að vita.  120 sekúndum síðar er búið að setja Hauk Næturinnar undir.  Nú var eins og hægðist á veröldinni.  

Drekinn beið spenntur eftir annari árás frá SunRay og var því alls óundirbúinn þegar að hann sér Haukinn læðast framhjá sér.  Hann rífur í hann til að gera svæðið hreint og vera tilbúinn fyrir aðra atlögu að SunRay - en áttar sig of seint á þessari laun fyrirsát.  Hann hafði verið leiddur í gildru.  Hann reynir strax að losa sig við þennan óboðna gest en það er of seint. 

Hrokinn var sem frosinn í framan.  Hann var búinn að sjá þetta allt fyrir og vissi hvernig þetta myndi enda.  Eftir að Drekinn áttaði sig á því að hann væri fastur tók hann stefnuna á steininn.  Hann hafði áður náð að berja sig við hann og losa sig og þetta yrði ekkert öðruvísi.  Án þess að Hrokinn þyrfti að segja Krauna það, var hann mættur með háfinn við steininn.  Þeir þekktu Drekann og vissu hvert hann stefndi.  Drekinn sá háfinn aldrei þegar hann umlukti hann á hraða ljóssins.  Baráttan tók nákvæmlega 99 sekúndur en í huga Hrokans jafngilti hver sekúnda einni mínútu - ef ekki klukkustund.  Nokkrum mínútum síðar fékk undirritaður símtal frá Hrokanum.  Ískalt sagði Hrokinn aðeins 2 orð.  "Tuttugu pund".

Fyrir þá sem að efast um orð mín hér að ofan, bendi ég á efitrfarandi myndband:
20 pund á 1:39!



Hollið endaði með 29 laxa og þarf voru Mokveiðimenn og Hilli með 19!  Verkfræðimúmín var ekki undrandi yfir aflatölum.  Í lokin gaf hann upp formúluna:

 X / Y = P   síðan   P * R = S
Þar sem X=laxar á land frá opnun til dagsetningar byrjun túrs
Þar sem Y=laxar á land frá opnun til sömu dagsetningar 2010
Þar sem P=stuðull til að nota við framhald útreikninga.
Þar sem R=laxar á land í sama holli 2010
Þar sem S=áætluð veiði í túr 2011

Verkfræðimúmún benti á, að það sem skekkti útkomuna um 4 laxa í plús voru aflaklærnar í Mokveiðifélaginu.  Í fyrra voru óvanir menn í stað þeirra og því munaði þessu.

Þetta var stórkostlegur túr í alla staði og strax byrjað að telja niður í þann næsta. 

Hér eru myndir af fegurðinni.

Kveðja,
Fyrrverandi Formaður
Lazymúmín

Múmíngengið, Máni og Sigþór (Formaður og Stallari ... eða Stiftamtmaður ... man ekki alveg) fóru í sinn árlega túr í Langadalsá í Ísafjarðardjúpi nú á dögunum.



Að segja að við höfum ekki verið spenntir - væri svipað og að væna Johnsen um að hafa nett gaman af Páli Óskari.  Tilhlökkunin var mikil þar sem við vissum af góðu vatni og af vænum afla hjá undanförnum veiðimönnum.

Það er ótrúlega stutt að skjótast í Langadalinn - sléttir 3.5 tímar.  Aðbúnaður allur í húsi er gríðarlega góður; stærðarinnar svefnálma (sér herbergi fyrir hvern veiðimann) og sér skáli fyrir matseld og afslappelsi.  Þar fyrir utan er góð geymsla undir vöðlur - og ekki má gleyma Gufu og Heitum potti - og þar fyrir utan stærðarinnar pallur og góð bílastæði.



Eftir að hafa rýnt í veiðibækur sáum við að síðasta holl hafði gert gott mót með 30 laxa.  Það var því mikill hugur í öllum þegar að menn skelltu sér í búninginn.

Það er skemmst frá því að segja að Sigþór fór á kostum í þessari ferð.  Hann náði þeim ótrúlega árangri að ná 1 laxi á öllum 4 svæðum árinnar - og m.a. á stöðum sem að við höfum aldrei náð laxi áður.  Ég hef sagt félögunum að "við" höfum verið með 5 laxa ... sem þýðir að ég náði að særa upp einn titt ... rétt eftir að Sigþór hafði náð 76cm hrygnu eftir magnaða töku - og enn magnaðri baráttu í Klettshyl. 



Seinni helming túrsins ættleiddum við veiðimann sem hafði verið varamaður fyrir Örn Kjartans - sem kom síðar inn í hópinn.  Doddi heitir hann og er alls óvanur laxveiðimaður.  Það var kannski helst af þeirri ástæðu sem að við slökuðum aðeins á og vonuðumst til að Doddi myndi ná Maríu laxinum.  Það gekk þó ekki eftir í þetta skiptið - og má kannski helst kenna um sól og glæru, ásamt fallandi vatni.

Það sem eftir stendur eftir túrinn, er að hafa loksins séð ánna í "góðu" vatni og getað farið á staði sem að hafa verið gersamlega "out" undanfarin 2 ár að minnsta kosti.



Grúppan endaði með 11 laxa sem er sirka á pari við undanfarna túra.  Má telja að við hefðum verið töluvert aflahærri ef að sólin hefði ekki tekið uppá því að glenna sig.  Reyndar býður sólin uppá afslappelsi með gott rauðvínsglas í eyðidal - en eins og þið vitið á laxinn á það til að taka pásu í þannig "árferði".

Langadalsá er stórkostleg Laxveiðiá sem kemur sífellt á óvart.  Við hlökkum til að koma þangað aftur .. og aftur ....... og aftur.

Hér má sjá fleiri myndir frá ferðalaginu

Máni og Sigþór
Stjórnarmenn

Þá er það smá pistill úr Veiðivötnum en við héldum þangað þriðjudaginn 2. ágúst síðastliðinn.  Eins og lög gera ráð fyrir var stoppað í Hrauneyjum (einni dýrustu vegsjoppu landsins) og tekinn börger.  Veðurspáin fyrir komandi daga var mun betri heldur en við áttum von á og það jók á bjartsýni manna.  Byrjað var í Snjóöldu og þar var slitinn upp 1 urriði en næst var haldið í Ónefndavatn þar sem stóru fiskarnir eru en taka ekki  


Við enduðum fyrsta daginn á Lönguströnd eins og í fyrra og reiknuðum að sjálfsögðu með veislu en það var nú ekki þannig.  Náðum samt að landa nokkrum en þetta var voðalegt kropp og t.d. virkaði flugan ekkert þrátt fyrir fínar aðstæður.  Þegar leið á kvöldið byrjaði að mígrigna þannig að þetta var asskoti blautt og ógeðslegt allt saman.



Morguninn eftir var skítaveður þannig að það var tekinn extra langur morgunmatur en fyrsta stopp var Rauðigígur en þar hafa feðgarnir stundum lent í hrikalegum urriðum.  Ekki þurftum við að bíða lengi eftir að fyrsti fiskur kæmi á land en það var 6 punda urriði og stuttu seinna landaði Noregsdeild Conráðs 9 punda.  Þeir voru viktaðir með þar til gerðrið stafrænni vog frá USA en útfararstjóri Conráðs hafði sínar efasemdir um gildi þessarar vogar en ekki hefur enn tekist að útkljá það mál.

Niðurfallið og Hrokinn fóru í nýtt vatn sem kallað er áttan en þar var stutt stoppað, þá var það Litlisjór, flott alda á móti okkur en ekki eitt einasta högg.  Útfararstjórinn og Noregsdeildin fóru í Hellavatn og Miðvatn og misstu þar ágætis fisk.  Klukkan var þá farin að detta í 16:00 og kominn tími á grill og botcha mót.  Grillið var glæsilegt að vanda en sumir áttu í einhverjum vanda með grillsessjónið rétt eins og í fyrra, nefni engin nöfn   Eftir gott grill, spjall og huggulegheit kom Noregsdeildin stormandi inn í bocha mótið og hirti græna vestið, innilega til hamingju með það.


Aftur var farið á lönguströnd í Litlasjó en þar var sama kroppið, nokkrir á land og enn virkaði flugan ekki rassgat.  Daginn eftir far Stóra-Fossvatn aðeins prófað og það nýr staður en þar var ekki einu sinni fugla á vappi, hvað þá fiskur    Hrokinn og Niðurfallið enduðu daginn í Litlasjó og náðu einum en fóru svo í hús og gengu frá.  Noregsdeildin og Útfararstjórinn áttu dag í viðbót á náðu nokkrum flottum bleikjum í Breiðavatni og einnig nokkrum urriðum í viðbót úr Litlasjó.
Það var ekki mikil veiði hjá okkur þetta árið en alveg hrikalega gaman eins og vanalega.  Þökkum Rúnari, Bryndísi og Hermanni kærlega fyrir okkur og vonumst svo sannarlega til að sjá þau aftur á næsta ári.

Hérna eru myndir úr ferðinni.

Kv. Nökkvi S (Niðurfallið)